Американскиот претседател Доналд Трамп изјави дека САД се многу блиску до договор со Иран и најави дека би можел да отпатува во Исламабад доколку таму биде потпишан евентуалниот договор, додека во позадина траат нови обиди за дипломатски пробив. Според Ројтерс, Трамп рекол дека следната рунда разговори меѓу САД и Иран би можела да се одржи веќе за време на викендот.
Говорејќи пред новинарите, Трамп порача дека договорот е блиску и дека, ако биде потпишан во пакистанската престолнина, можно е лично да присуствува. Исламабад во меѓувреме се наметнува како клучна точка за посредување, а Пакистан последниве денови има засилена улога во обидите да се одржат каналите за комуникација меѓу Вашингтон и Техеран.
Според светските медиуми, на маса не е нужно целосен мировен договор, туку и можност за привремен меморандум што би спречил нова ескалација. Ројтерс наведува дека меѓу спорните точки остануваат иранската нуклеарна програма, санкциите и иднината на збогатениот ураниум, иако Трамп тврди дека има знаци на подготвеност за компромис.
Неговата изјава доаѓа во момент кога нафтените пазари веќе реагираат на секој дипломатски сигнал од регионот. Самата можност за нови разговори и за евентуален договор придонесе цените на нафтата повторно да се спуштат под 100 долари за барел, што покажува колку силно геополитиката во моментов влијае врз глобалната економија.
Иако Трамп вели дека војната со Иран „треба наскоро да заврши“, засега нема потврда дека договорот е готов. Но самата најава за можен потпис во Исламабад и можноста американскиот претседател лично да се појави таму покажуваат дека разговорите влегуваат во чувствителна и политички многу важна фаза.
