Црната хроника повторно ги потресе македонските патишта по уште една тешка сообраќајна несреќа на експресниот пат Прилеп–Градско во која две лица го загубија животот, а едно се наоѓа во критична состојба.

Tрагедијата се случила попладнево пред клучката кај Кавадарци кога од сè уште неутврдени причини директно се судриле две патнички моторни возила. Во едниот автомобил од силината на челниот удар на лице место починале маж и жена, додека во другото возило се наоѓал триесет и деветгодишен жител на Прилеп кој се здобил со тешки и опасни по живот повреди.

На местото на кобниот судир веднаш интервенирале екипи на Итната медицинска помош, полициски службеници и противпожарни единици кои морале да се справат со згмечените лимови за да го извлечат повредениот прилепчанец, по што тој итно бил пренесен во болницата во Кавадарци каде лекарите будно се борат за неговиот живот.

Увидната екипа на Министерството за внатрешни работи работи на терен на прецизно утврдување на причините кои довеле до оваа сообраќајна катастрофа.

Овој трагичен настан дополнително го вклучува алармот за безбедноста на оваа патна оска која беше пуштена во употреба минатото лето, со оглед на фактот што за само неколку месеци на оваа делница животот веќе го загубија седум лица, а повеќе од десетмина завршија со тешки телесни повреди.