Во вест што веројатно ќе ги изненади сите оние што се навикнати на затворениот и брз животен стил на британската престолнина, Лондон е прогласен за најгостопримлив град за туристи во цела Европа.

Истражувањето spроведено од провајдерот за eSIM картички Holafly опфати 200 градови ширум светот, оценувајќи ги според четири клучни параметри: општата безбедност, визната отвореност, достапноста на туристички информации и нивото на познавање на англискиот јазик кај локалното население.

На глобалната листа, Лондон се пласираше на високото второ место, веднаш зад победникот. Велика Британија во целина се покажа како една од најпријателските земји за странски посетители, со оглед на тоа што и шкотската престолнина Единбург се најде во првите дваесет дестинации, заземајќи го 11-то место.

Европскиот континент има силно присуство во светскиот врв, при што девет градови се изборија за место во топ 20. Покрај Велика Британија, уште две европски земји имаат по два претставника на листата. Данска е застапена со Копенхаген на деветтото и Орхус на десеттото место, додека Чешка влезе во елитното друштво со Прага на 16-то место и Брно на 20-то место.

Сепак, тоа не беше доволно Европа да ја однесе титулата за земја со најмногу гостопримливи градови. Канада успеа да запише дури три свои метрополи во глобалниот топ 20, со Отава на 14-то место, Торонто на 18-то и Монтреал на 19-то место.

На самиот врв на светско ниво се искачи азискиот град-држава Сингапур, кој ја освои престижната прва позиција. Неговата победа се должи на високата оценка за безбедност од 77,7 поени на платформата Numbeo, исклучителната визна отвореност и широката мрежа на пунктови за помош и информирање на туристите низ целата земја.

Покрај Сингапур и Лондон, меѓу првите пет најпријателски дестинации во светот се пласираа уште и Сиднеј во Австралија, како и американските метрополи Њујорк и Бостон.

Дополнително, на листата на 20 најгостопримливи градови во светот свое место изборија и холандските градови Хаг, Утрехт и Амстердам, малезискиот остров Пенанг, Хонг Конг, Давао од Филипините и Мелбурн од Австралија.