Двајца тинејџери во понеделникот отвориле оган во комплексот на Исламскиот центар во Сан Диего, при што убиле тројца мажи пред џамијата, меѓу кои и еден обезбедувач, пред и самите да бидат пронајдени мртви, најверојатно од самонанесени прострелни рани, соопшти полицијата.

Сите деца кои посетуваат училиште во рамки на Исламскиот центар, најголемата џамија во регионот близу границата со Мексико – биле пронајдени и безбедно евакуирани по пукањето, кое започнало непосредно пред пладне по локално време, изјавил началникот на полицијата во Сан Диего, Скот Вал.

ФБИ го истражува нападот како злосторство од омраза

Вал изјавил дека ФБИ е повикан да помогне во истрагата, а властите случајот го третираат како злосторство од омраза. Нападот се случил една недела пред големиот муслимански празник Курбан Бајрам. Сведок за CBS изјавил дека слушнал околу 30 истрели од, како што му се чинело, полуавтоматско оружје.

„Добро е што ова не се случи во петок, бидејќи улиците ќе беа полни со луѓе“, рекол сведокот.

Имамот Таха Хасане, директор на Исламскиот центар во Сан Диего, на прес-конференција порача:

„Ова е место за молитва, а не бојно поле.“

Тој додаде дека никогаш претходно не доживеале ваква трагедија и оцени дека е „крајно шокантно да се нападне верски објект“.

Реакции од политичарите

Гувернерот на Калифорнија, Гевин Њусом, изјави дека е „ужаснат од денешниот насилен напад“ во центар каде што семејства и деца се собираат во мир.

„Калифорнија нема да толерира терористички акти ниту заплашување на верски заедници“, рече Њусом.

Американскиот претседател Доналд Трамп нападот го нарече „ужасна ситуација“ и порача дека властите многу сериозно ќе се занимаваат со случајот.

Напаѓачите пронајдени мртви

Полицијата на местото на настанот пронашла тела на тројца мажи поврзани со џамијата, вклучувајќи и обезбедувач за кого се верува дека помогнал да се спречи уште поголемо крвопролевање.

Набргу потоа биле откриени и телата на двајцата осомничени, на возраст од 17 и 19 години, во возило паркирано на улица. Тие починале од самонанесени прострелни рани, соопштил Вал. Во моментот на нападот, децата биле на настава во училиштето „Ал Рашид“, кое се наоѓа во рамки на Исламскиот центар. Телевизиските снимки покажале како децата, држејќи се за раце, под полициска придружба се евакуираат од паркингот.

На оружјето имало испишани пораки на омраза

Истрагата покажала дека мајката на еден од осомничените два часа пред нападот ја известила полицијата дека нејзиниот син ја напуштил куќата со неколку пиштоли и автомобил, заедно со пријател, а двајцата биле облечени во маскирна облека. Според Вал, младиот човек оставил порака што содржела „општа реторика на омраза и говор на омраза“, но без конкретна закана кон џамијата или друго лице.

На едно од оружјата биле испишани пораки на омраза, а полицијата наведува дека тие опфаќале „широк спектар“ и биле од општ карактер. Исламскиот центар во населбата Клермонт е најголемата џамија во округот Сан Диего и во него се наоѓа и училиштето „Bright Horizon Academy“, кое обезбедува исламско образование.