Дваесетте најголеми технолошки компании во светот во 2025 година остваруваат повеќе од 3 билиони долари приходи, а главни двигатели на растот се cloud услугите, вештачката интелигенција и потрошувачката технологија.

На врвот на листата според приходи е „Амазон“, со околу 670 милијарди долари, со што ја надмина „Епл“, чиј приход од продажба на хардвер достигнал 409 милијарди долари. Американските технолошки гиганти како „Алфабет“, „Мајкрософт“ и „Мета“ остануваат меѓу седумте најголеми компании, потврдувајќи ја доминацијата на САД во глобалниот технолошки сектор.

Во Азија, пак, компании како „Самсунг“ и „Тенсент“ продолжуваат да водат во производството и дигиталните услуги.

Вештачката интелигенција драматично ја зголеми добивката на „Нвидија“, чиј профит повеќе од двојно пораснал во текот на 2024 година. Благодарение на AI бумот, компанијата остварила приходи од 165,21 милијарди долари со само 36.000 вработени, што значи дека приходот по вработен достигнал околу 4,58 милиони долари – најмногу во индустријата.

„Мајкрософт“ и „Алфабет“ исто така продолжуваат со силен раст преку cloud услугите, додека „Амазон“ останува лидер во е-трговијата. Од друга страна, „Интел“ се соочува со предизвици. Приходите на компанијата паднале од 54,22 милијарди долари во 2023 на 53,10 милијарди долари во 2024 година. Причините се силната конкуренција од AMD и Qualcomm, доцнењата во производството и слабата побарувачка на пазарот за персонални компјутери.

Анализите покажуваат и силна поврзаност меѓу бројот на вработени и приходите на компаниите, но приходот по вработен станува клучен показател за ефикасноста. Според CSIMarket, приходот по вработен во американскиот технолошки сектор на почетокот на 2025 година пораснал на околу 627.744 долари, поттикнат од експанзијата на AI и cloud технологиите.