Секое четврто младо лице на возраст од 11 до 17 години не се занимава со спорт ниту со активности што барем делумно го оптоваруваат срцето и крвните садови, покажува новиот извештај на Светската здравствена организација (СЗО), објавен вчера.

Извештајот под наслов „Генерација на која ѝ недостига движење – глобални трендови во физичката активност на адолесцентите од 2010 до 2025 година“ покажува дека 25 проценти од младите во оваа возрасна група не ги остваруваат здравствените придобивки од редовната физичка активност.

„Тие се лишени од придобивките што ги носи доволната и редовна физичка активност“, предупредува СЗО.

Само 14 отсто од младите се активни најмалку еден час дневно

Според истражувањето, само 14 проценти од младите на возраст од 11 до 17 години изјавиле дека секојдневно се занимаваат со умерена до интензивна физичка активност најмалку еден час. Извештајот се заснова на истражувања спроведени во 140 земји, во кои учествувале повеќе од три милиони испитаници.

СЗО посочува дека едно од ограничувањата на истражувањето е тоа што разбирањето на умерената или интензивната физичка активност може да се разликува во зависност од регионот и културата. Истражувањето покажало дека девојчињата се помалку физички активни од момчињата во речиси сите земји. Повеќе од една четвртина од девојчињата, односно 28 проценти, изјавиле дека во текот на претходната недела немале ниту еден ден со физичка активност.

Истото го навеле 22 проценти од момчињата. Девојчињата поретко од момчињата изјавувале и дека се физички активни секој ден.

„Овој тренд е загрижувачки бидејќи адолесценцијата е клучен период за усвојување здравствени навики што остануваат за цел живот“, истакнува Светската здравствена организација.