Светската здравствена организација прогласи дека епидемијата на ебола во Демократска Република Конго и Уганда претставува „јавноздравствена вонредна состојба од меѓународно значење“, но нагласи дека ситуацијата не ги исполнува критериумите за пандемија. Епидемијата е предизвикана од Bundibugyo сојот на вирусот ебола, за кој во моментов нема одобрени специфични вакцини или терапии.

Според СЗО, до 16 мај во провинцијата Итури во ДР Конго биле пријавени осум лабораториски потврдени случаи, 246 сомнителни случаи и 80 сомнителни смртни случаи. Жаришта се здравствените зони Бунија, Рвампара и Монгбвалу, а потврден случај е регистриран и во главниот град Киншаса кај лице што се вратило од Итури.

Во Уганда, во главниот град Кампала, се потврдени два случаи, меѓу кои и еден смртен, кај лица што патувале од Демократска Република Конго. СЗО предупредува дека меѓународното ширење веќе е документирано, а земјите што имаат копнена граница со Конго се изложени на висок ризик поради движењето на населението, трговијата, патувањата и неизвесноста околу вистинскиот обем на епидемијата.

Организацијата оценува дека е можно епидемијата да е поголема од она што во моментов се открива и пријавува. Дополнителен ризик претставуваат несигурноста во делови од источен Конго, хуманитарната криза, големата мобилност на населението и можноста за ширење преку здравствени установи, откако се пријавени и смртни случаи меѓу здравствени работници.

СЗО препорачува засилена координација, брзо откривање и изолација на случаи, следење контакти, подобрена заштита во здравствените установи и подготвеност во соседните земји. Засега не се препорачува затворање на граници, туку контролирани мерки што ќе спречат ширење без да го турнат движењето на луѓето во нерегулирани рути.