На денешното рочиште, судот му изрече 12-годишна затворска казна на Стојанче Јовановски, обвинет за три кривични дела поврзани со трагедијата од 2 март, кога животот го загубија неговата сопруга Ивана Јовановска и нивната шестгодишна ќерка Катја.
Пресудата беше изречена во Основниот кривичен суд Скопје, откако обвинителството во завршните зборови побара максимална казна, оценувајќи дека во постапката бил докажан континуитет на физичко, психичко и економско насилство врз Ивана Јовановска. Обвинителството тврдеше дека не станува збор за изолиран инцидент, туку за подолготраен образец на контрола и малтретирање, кој кулминирал со трагичниот настан. На снимките направени пред почетокот на судењето се гледа како Стојанче Јовановски седи во судницата со насмевка, пред судот да ја изрече пресудата.
Јовановски беше обвинет за телесни повреди сторени како продолжено дело при семејно насилство, загрозување на сигурноста и наведување и помагање во самоубиство. Во текот на судската постапка беа презентирани аудио и видеоматеријали, медицинска документација, психијатриско вештачење и сведочења, врз кои обвинителството ја темелеше тезата дека Ивана била изложена на долготрајно насилство и притисок.
Одбраната бараше ослободителна пресуда, тврдејќи дека обвинителството не ги докажало ниту последиците, ниту причинско-последичната врска меѓу постапките на обвинетиот и трагедијата. Адвокатот Давор Ангелевски во завршниот збор оценил дека доказите биле контрадикторни, а сведочењата претежно посредни, поради што, според одбраната, не можело да се утврди вина надвор од разумно сомневање.
Јовановски ги отфрли обвинувањата дека ја поттикнувал или охрабрувал сопругата на самоубиство, а претходно, на почетокот на судењето, според медиумските извештаи, признал вина за нанесување телесни повреди и загрозување на сигурноста, но не и за делото наведување и помагање во самоубиство.
Случајот предизвика силна реакција во јавноста, бидејќи повторно го отвори прашањето за семејното насилство, институционалната заштита и последиците од психичкото и физичкото малтретирање. Обвинителството во завршницата на процесот порача дека казната треба да испрати порака дека семејното насилство не е приватна работа, туку кривично дело што може да има смртоносни последици.
