Во рамки на програмата „Македонски филм. На големо платно“, публиката ќе има можност бесплатно да го погледне филмот „Сите го викаат Реџо“ на режисерот Ибер Деари.
Проекцијата ќе се одржи на 15 јуни, со почеток во 19:00 часот, во Cineplexx, а влезот е бесплатен.
„Сите го викаат Реџо“ е приказна за едно село во криза и за човек кој, и покрај тешкотиите, се обидува да ја зачува надежта, семејството и достоинството.
Во центарот на филмот е Реџо, кој заедно со сопругата и синот се соочува со предизвиците што ја притискаат нивната заедница. Неговата приказна се испреплетува со животите на соседите, создавајќи мозаик од човечки судбини, борби, соништа и мали победи.
Но, средбата со Мифтaр, сомнителен лик кој го вовлекува во свет на измама, го носи Реџо до пресвртна точка. Една ризична партија карти завршува со насилен судир што ќе ги потресе сите.
По тој настан, Реџо се наоѓа на животна раскрсница. Селото што некогаш му било дом повеќе не му носи мир, а идејата за заминување и нов почеток станува сè посилна.
Филмот ги отвора темите на семејството, сиромаштијата, миграцијата, припадноста и човечката потреба за смисла, поврзаност и подобар живот.
Режијата е на Ибер Деари, а во филмот играат Adriana Matoshi, Afrim Muçaj и Ledion Mulaku. Жанровски, филмот е драма со елементи на комедија, а времетраењето е 90 минути.
