Шведскиот парламент усвои пакет контроверзни миграциски мерки што дополнително ја заоструваат политиката кон имигрантите, предизвикувајќи жестоки реакции од организациите за човекови права и дел од опозицијата.

Со новото законодавство, властите ќе можат да одземаат дозволи за престој врз основа на нејасно дефинирано „лошо однесување“, додека голем број вработени во јавниот сектор ќе бидат обврзани да ги пријавуваат лицата за кои се сомневаат дека немаат регулиран престој во земјата.

Мерките доаѓаат во пресрет на парламентарните избори во септември, во време кога владата на десниот центар се соочува со силен притисок од крајната десница за уште построга миграциска политика.

Министерот за миграција Јохан Форсел изјави дека секој што не покажува подготвеност да ги почитува правилата не треба да смета на можноста да остане во земјата. Иако законот не прецизира кои постапки се сметаат за неприфатливи, властите како примери наведуваат неплатени долгови, даночни прекршоци, криминални активности и поврзаност со екстремистички организации.

Критичарите предупредуваат дека ваквата формулација остава простор за произволни одлуки. Организациите за човекови права оценуваат дека луѓето би можеле да се соочат со санкции и поради постапки кои не претставуваат кривично дело ниту се казниви за шведските државјани.

Особено внимание привлече таканаречениот „закон за пријавување“, кој беше усвоен со тесно парламентарно мнозинство. Според него, службениците во одредени јавни институции ќе мора да ја известат полицијата доколку се посомневаат дека некое лице престојува во земјата без соодветна документација.

По бројните критики, од оваа обврска се изземени наставниците, лекарите и социјалните работници. Сепак, вработените во даночните служби, институциите за социјално осигурување и службите за вработување ќе мора да постапуваат согласно новите правила.

Невладините организации предупредуваат дека законите може да создадат атмосфера на страв и недоверба, при што мигрантите ќе избегнуваат контакт со институциите, вклучително и здравствените установи. Според нив, новите мерки ризикуваат да поттикнат расно профилирање и дополнителна маргинализација на луѓето без регулиран статус. Шведската влада, пак, тврди дека законите се неопходни за поефикасно спроведување на миграциските правила и за враќање на лицата кои немаат законско право на престој во земјата.