Најмалку седум лица го загубија животот, а уште две се потешко повредени во филмска сообраќајна несреќа што се случи утринава на западот на Унгарија. Унгарската полиција официјално објави дека трагедијата се случила во моментите кога патнички минибус со голема брзина удрил директно во камион кој стоел во место на автопатот М1. Сообраќајот на овој патен правец бил во целосен застој поради друг инцидент кој се случил малку порано на истата локација, каде што товарен камион се судрил со градежно возило и во кој исто така загина едно лице, создавајќи огромен метеж на патот.

Во минибусот кој налетал на блокираната колона со возила имало вкупно девет лица. Според официјалните информации кои полицијата ги сподели за унгарскиот медиумски портал „24.hu“, сите седум жртви од минибусот биле мажи, а самото возило се движело со молдавски национални регистарски таблички. На местото на несреќата веднаш излегле бројни противпожарни и медицински екипи кои со часови работеле на извлекување на настраданите граѓани.

По повод оваа голема трагедија, на социјалните мрежи се огласи и унгарскиот лидер Петер Маѓар, кој потврди дека сите жртви се странски државјани, притоа упатувајќи изрази на најдлабоко сочувство до нивните семејства. Повредените патници се итно пренесени во најблиските болнички центри каде медицинските лица се борат за нивните животи, а полицијата сè уште врши увид за да ги утврди прецизните причини кои доведоа до оваа црна утринска хроника во Унгарија.