Осум лица загинаа откако американски стратешки бомбардер Б-52 „Стратофортрес“ се урна непосредно по полетувањето од воздухопловната база Едвардс во Калифорнија. Станува збор за најсмртоносната несреќа со овој тип авион во последните повеќе од четири децении.

Според официјалните информации, авионот бил ангажиран на рутинска тест-мисија во рамки на програмата за модернизација на радарскиот систем, кога дошло до несреќата само неколку моменти по полетувањето. Меѓу загинатите има припадници на американските воздухопловни сили, државни службеници и соработници на владините институции. Компанијата Боинг потврди дека меѓу жртвите се и двајца нејзини вработени.

Сочувство до семејствата на загинатите упатија секретарот на американското воздухопловство Трој Мајнк, претседателот на Претставничкиот дом на САД, Mike Johnson, како и гувернерот на Калифорнија, Gavin Newsom.

Воените власти отворија официјална истрага за причините за несреќата. Првичните резултати не се очекуваат пред истекот на шест месеци. Несреќата е најтешка за бомбардер од типот Б-52 од 1982 година, кога во сличен инцидент за време на тренинг-лет во Калифорнија загинаа девет членови на екипажот.

Б-52 „Стратофортрес“ е во оперативна употреба од 1955 година и претставува еден од најдолговечните авиони во составот на американските воздухопловни сили. Иако одамна не се произведува, леталото континуирано се модернизира со нови мотори, електронски системи и напредна опрема. Овој тип бомбардер имаше значајна улога во воените операции на САД, вклучително и во војната во Заливот, а во последниот период беше ангажиран и во операции поврзани со конфликтот со Иран.