Русија во текот на ноќта изврши нов ракетен напад врз Киев, при што беа употребени балистички ракети. Во нападот се повредени најмалку две лица, а на повеќе локации избувнаа пожари. Експлозиите одекнале во украинскиот главен град непосредно пред да биде активирана тревогата за воздушен напад. Украинските воздухопловни сили предупредија на опасност од балистички ракети, додека локалните власти ги повикаа жителите да останат во засолништата.

Градоначалникот на Киев, Виталиј Кличко, соопшти дека ракетниот удар предизвикал пожар во магацински објекти во населбата Десњански, додека во Свјатошински избувнал уште еден пожар во деловен објект.

Според украинската Државна служба за вонредни состојби, во Свјатошински се запалиле административна зграда и складишта, при што две лица биле повредени, а едно од нив е хоспитализирано. На друга локација во истата населба избувнал пожар во гаражен комплекс, при што биле оштетени трамваи и административна зграда.

Украинските власти предупредуваат дека, со оглед на застојот на копнената офанзива, Русија сè почесто користи балистички ракети за да нанесе што поголема штета врз украинските градови.

Одбраната на Киев во голема мера зависи од системите Patriot, кои остануваат единственото докажано ефикасно средство за пресретнување балистички ракети. Сепак, украинските власти предупредуваат дека резервите на ракети-пресретнувачи постепено се намалуваат.

Ова е трет голем напад врз Киев во последните неколку дена. На 6 јули во еден од најсмртоносните руски напади загинаа најмалку 26 лица, додека само четири дена претходно, на 2 јули, во комбиниран напад со ракети и беспилотни летала загинаа 31 лице, а повеќе од 100 беа повредени.