Руските преговарачи на состаноците во Абу Даби изјавиле дека рускиот претседател Владимир Путин ја започнал инвазијата врз Украина бидејќи тогашниот американски претседател Џо Бајден не одговорил на неговото писмо со безбедносни барања од 2021 година, пренесува Аксиос повикувајќи се на два извори запознаени со разговорите. Во исто време, американските пратеници Џаред Кушнер и Стив Виткоф побарале од Москва да подготви нов безбедносен предлог за Европа и да дозволи европско учество во мировниот процес.
Разговорите во Абу Даби, кои се одржаа во вторникот и средата со посредство на Џаред Кушнер, Стив Виткоф и командантот на Европската команда на САД, генералот Алексус Гринкевич, беа прва директна средба меѓу руски и украински претставници од февруари годинава. Дијалогот претходно беше прекинат поради војната во Иран.
На тврдењето на руската делегација за неодговореното писмо од 2021 година, Кушнер и Виткоф одговориле дека светот оттогаш значително се променил. Тие предложиле Русија да изготви нов документ во кој покрај своите безбедносни барања ќе наведе и симетрични чекори за деескалација, со кои ќе ја увери Европа дека нема да нападне во иднина.
„Им кажавме на Русите дека ги имаат своите желби и стравови, но мора да понудат поинаква деескалација и поинакви предлози доколку сакаат Европа да ги прифати тие предлози на добар начин“, изјави Кушнер на прес-конференцијата по завршувањето на разговорите во средата.
Американските преговарачи исто така условиле дека за сериозни разговори за европската безбедност е неопходно Москва да се согласи европски претставници да се приклучат на идните рунди преговори.
Руската делегација, предводена од советникот на Путин, Владимир Медински, засега одбива директно вклучување на европските земји во мировните преговори со Украина. Медински на прес-конференцијата ги обвини раководствата на повеќе европски држави за колективна измама на украинскиот народ и придонес кон цивилните жртви, додавајќи дека не гледа за што би можело да се разговара со нив.
Сепак, Медински потврди дека Русија сака да постигне поширок безбедносен договор со Европа како дел од спогодбата за крај на војната. Тој ја опиша состојбата во Украина како апсцес што пукнал и порача дека мора да се лекува целото тело, а не да се става само фластер.
Администрацијата на актуелниот американски претседател Доналд Трамп се залага за истовремено преговарање за нова европско-руска безбедносна архитектура и за мировен договор меѓу Русија и Украина. Според извор запознаен со ставовите на Белата куќа, примената на новиот безбедносен аранжман би започнала дури по постигнувањето договор за прекин на војната.
Претседателката на Европската комисија, Урсула фон дер Лајен, пред средбата во Абу Даби изјави дека Европа ќе разговара за нова безбедносна архитектура дури откако ќе заврши војната во Украина. Но, два извори потврдија дека европските дипломати присутни во Абу Даби се согласиле да учествуваат на двата колосека паралелно, со јасен услов конечните одлуки да се донесат по завршувањето на војната.
Од Вашингтон им порачале на европските сојузници дека САД нема да склучат никаков безбедносен договор со Русија без согласност од Европа и Украина, ниту пак ќе ѝ дозволат на Москва право на вето врз европските безбедносни прашања.
Во Абу Даби завојуваните страни постигнаа договор за размена на воени заробеници, за која Кушнер и украинскиот преговарач Давид Арахамија оценија дека може да биде најголема од почетокот на војната. Точниот број на заробеници што ќе бидат ослободени ќе се утврди во четврток на одвоените средби на Кушнер и Виткоф со Владимир Путин во Москва и со украинскиот претседател Володимир Зеленски во Даблин.
Пред и по средбите во Абу Даби, американскиот и украинскиот тим ги информирале високите дипломати од Германија, Обединетото Кралство, Франција, Италија, Европската Унија (ЕУ) и Северноатлантската алијанса (НАТО). Повеќе европски влади остануваат длабоко сомничави кон пристапот на американската администрација и не веруваат дека Русија би почитувала каков било постигнат договор.
