Соединетите Американски Држави мора да спречат влез на каков било случај на ебола во земјата од Демократска Република Конго, каде епидемијата досега зафатила околу 900 лица, а постои сомнеж за повеќе од 220 смртни случаи, изјави американскиот државен секретар Марко Рубио.

„Не можеме и нема да дозволиме ниту еден случај на ебола да влезе во Соединетите Американски Држави“, му порача Рубио на претседателот Доналд Трамп за време на состанок на кабинетот.

САД ја засилуваат помошта во Африка

Рубио објасни дека американските агенции, меѓу кои Стејт департментот, Центрите за контрола и превенција на болести и Министерството за здравство, вложуваат значителни напори за сузбивање на кризата на терен.

Тој нагласи дека Вашингтон ја зголемил помошта за погодените земји, пред сè за ДР Конго, со цел епидемијата да се стави под контрола уште на самиот извор.

Воведени ограничувања за патување

Како мерка на претпазливост, американските Центри за контрола и превенција на болести минатата недела воведоа 30-дневно ограничување за влез на патници кои во последните 21 ден престојувале во ДР Конго, Уганда или Јужен Судан.

Мерката ги опфаќа и лицата со постојан престој во САД, односно носителите на зелена карта. Дополнително, патниците од овие земји поминуваат низ засилени проверки на три американски аеродроми.

Изјавата на Рубио доаѓа во момент кога западните земји ги заоструваат здравствените контроли поради ширењето на еболата во Африка и стравувањата дека вирусот може да се пренесе преку меѓународни патувања.