Повеќе од 2.000 учесници, 100+ говорници, 400+ стартапи и 200+ инвеститори од над 50 земји беа дел од второто издание на Startup Revolution AI Summit, кое се одржа од 1 до 4 октомври во Скопје.
Во организација на Startup Club Skopje, самитот ги поврза основачите од Македонија и регионот со меѓународни инвеститори, експерти и компании, создавајќи можности за учење, соработка и пристап до нови пазари.
Настанот го отвори премиерот Христијан Мицкоски, а свои обраќања имаа и министерот за дигитална трансформација Стефан Андоновски, директорката на ИНОВА Даниела Димовска, амбасадорот на Швајцарија во Северна Македонија Кристоф Зомер и Лаура Ѓурагиќ, директорка за односи со јавноста во Амбасадата на САД во Северна Македонија.
Главната конференциска програма се одржа на 2 и 3 октомври во Македонската филхармонија, на Main Stage, Startup Stage и Scale-Up Stage. Меѓу говорниците беа претставници на Preply, Lovable, Make, Wonderful AI и CAKE.com, со теми од вештачка интелигенција и автоматизација до FinTech, HealthTech, сајбербезбедност, економија на креатори и климатски технологии.
Значаен дел од искуството се одвиваше и надвор од сцените, каде што основачите работеа на своите идеи, добиваа менторска поддршка и ги презентираа компаниите пред потенцијални инвеститори и партнери. Програмата вклучуваше:
- Предизвик во живо на The Founder Games, предводен од Сања Митровска и тимот на The Founder Games.
- Pitch-сесија на Western Balkans Accelerator Program, програма спроведена од Startup Wise Guys, со поддршка на Европската банка за обнова и развој (ЕБРД) и Swiss EP, во соработка со STIKK, Makerspace Innovation Center Prizren и Zephyr Angels.
- Шест тематски работилници во Македонската филхармонија, организирани од Startup Club Skopje, со експерти меѓу кои Поли Барнфилд од Maybe*, Филип Книшевски од Spiral Agency и Дејвид Амор од EnsoBrain, како и Оргест Кока со работилница за Microsoft Fabric.
- Првиот OpenAI DevDay Community Exchange со Codex во Скопје, одржан во просториите на ИНОВА, со учество на Берат Ќамили и Дарко Јаневски.
- Hack for Humanity хакатон со AI Collective и Women in Tech, предводен од Моника Ризовска Таневска и одржан во ИНОВА.
- Women’s M.I.X.E.R., реализиран со поддршка на Swiss Entrepreneurship Program (Swiss EP).
- Investors Kafana, организирана од Zephyr Angels.
- Менторски сесии и презентации за четвртата генерација на #ИмамИдеја, инкубаторската програма на Startup Club Skopje, поддржана од ПроКредит Банка.
- Две Dare2Scale сесии, организирани од Endeavor Bulgaria, со учество на Ели Жабевска од South Central Ventures и Ведран Бајер од Wonderful AI.
Заедно со Startup Launch и Startup Expo, овие активности создадоа простор за практична работа и директно поврзување. Партнерите придонесоа со своите заедници, експертиза и програми, проширувајќи ги можностите за учесниците.
Еден од главните моменти беше Startup World Cup Regional Pitch Competition, на кој настапија 13 стартапи. Победник беше CoachBot, предводен од Lewin Keller, кој обезбеди место на глобалното финале во Сан Франциско и можност да се натпреварува за инвестиција од 1 милион долари.
„Драго ни е што успеавме да бидеме добри домаќини, да ги претставиме нашата држава и регионот пред глобалната стартап сцена и да ги обединиме сите чинители од домашниот и регионалниот стартап екосистем. Следната година во ноември нè очекува уште поголемо издание на самитот. Подготовките веќе ги започнавме, а датумите се познати од 26 до 29 ноември 2027 година, повторно во Скопје“, истакна Сашо Јовановски, претседател на Startup Club Skopje.
Вредноста на Startup Revolution продолжува и по завршувањето на самитот преку контактите што прераснуваат во партнерства, разговорите што отвораат деловни можности и знаењата што основачите ги применуваат во своите компании.
