Европската комисија ја предупреди Албанија дека проектот за луксузен ресорт поврзан со Џаред Кушнер, зетот на Доналд Трамп, може да ја доведе земјата во судир со еколошките правила на Европската Унија и да го загрози затворањето на Поглавје 27, кое се однесува на животната средина и климатските промени.
Според изјава на неименуван портпарол на Европската комисија за „Политико“, од Албанија се очекува да се воздржи од дејствија што би можеле да го поткопаат исполнувањето на завршните критериуми во пристапните преговори. Брисел очекува албанските власти да дејствуваат без одложување и целосно да се усогласат со европското законодавство, вклучително и со директивите за птици и живеалишта.
Проектот се однесува на луксузно одморалиште кај Зврнец, во близина на заштитената област Вјоса-Нарта и островот Сазан. Еколошките организации предупредуваат дека станува збор за чувствително подрачје во кое живеат фламинга, фоки и каде што има места за гнездење на желки. Според критичарите, голема туристичка градба во оваа зона може сериозно да ја наруши природата.
Од Европската комисија посочуваат дека министерот за животна средина на Албанија, Софјан Јаупај, ги информирал во Брисел дека изградбата на проектот е суспендирана и дека ќе се спроведе проценка на влијанието врз животната средина, во соработка со граѓанското општество.
Во меѓувреме, протестите во Албанија се засилија и веќе се нарекуваат „Фламинго-револуција“. Граѓани протестираат против проектот, барајќи заштита на природата и повлекување на плановите за изградба. Дел од протестите се проширија и меѓу албанската дијаспора во Њујорк, Лондон, Брисел, Милано и Берлин.
Дополнителна тежина на случајот му дава и истрагата што ја отвори албанското Специјално обвинителство за борба против корупцијата, СПАК. Истрагата се однесува на спорните промени во заштитениот статус на подрачјето и сопственоста на земјиштето во 2024 година. Критичарите тврдат дека токму измените во Законот за заштитени подрачја отвориле простор за големи инвестиции во чувствителни природни зони.
Премиерот Еди Рама го брани проектот како можност за развој на туризмот и привлекување големи странски инвестиции. Во интервју за „Политико“, тој изјави дека „да не беше Џаред, никому немаше да му биде гајле за проектот“.
Но случајот сега има многу поголема тежина од локална туристичка инвестиција. Албанија е меѓу земјите што важат за фаворити за побрз напредок кон ЕУ, заедно со Црна Гора, а Рама постави цел земјата да се приклучи кон Унијата до 2030 година. Токму затоа спорот околу ресортот поврзан со Кушнер станува тест за тоа дали Тирана може да ги помири големите инвестиции со европските правила за природа, транспарентност и владеење на правото.
