Протестите во Тирана ескалираа во судири меѓу демонстранти и полицијата пред зградата на албанскиот парламент, а според албанските медиуми, најмалку шест лица биле приведени.

Околу 200 демонстранти се собрале пред парламентот во моментот кога пратениците пристигнувале на пленарната седница.

Учесниците на протестот прво фрлале јајца кон автомобилите на пратениците, по што полицијата се обидела да ги оддалечи од пристапот до зградата, објавува „Гардијан“.

Ситуацијата потоа ескалирала кога дел од демонстрантите почнале да фрлаат шишиња со вода и остриги кон полицајците, што довело до физички конфронтации и апсења.

Според албанските медиуми, дел од демонстрантите подоцна се собрале пред полициската станица, барајќи ослободување на приведените.

„Фламинго револуцијата“ трае со недели

Протестите се дел од пошироко антивладино движење познато како „Фламинго револуцијата“, во кое илјадници граѓани со недели бараат оставка од премиерот Еди Рама.

Бранот протести првично беше предизвикан од плановите за изградба на луксузен туристички комплекс во заштитениот крајбрежен резерват Вјоса-Нарта и на островот Сазан.

Проектот е поддржан од странски инвеститори, меѓу кои и Џаред Кушнер, зет на американскиот претседател Доналд Трамп.

Еколошките протести во меѓувреме прераснаа во пошироко граѓанско движење против владата.

Демонстрантите на митинзите носат големи гумени фламинга и транспаренти со пораки како „Албанија не е на продажба“, обвинувајќи ја владата за корупција, фаворизирање блиски кругови и продажба на национални ресурси на странски инвеститори.

Рама ги отфрла барањата за оставка

И покрај секојдневните протести, премиерот Еди Рама ги отфрла барањата на демонстрантите и порача дека нема да поднесе оставка.

Протестното движење, сепак, продолжува да добива внимание и надвор од Албанија.

Поддршка од европски пратеници

Како што објавува „Политико“, некои членови на Европскиот парламент присуствувале на протестите во претходните денови.

Италијанската европратеничка Иларија Салис ги поддржала демонстрантите во недела, додека германската европратеничка Јута Паулус и холандските европратенички Тинеке Стрик и Ана Столтенберг од групата на Зелените им се придружиле во понеделник.

Тие се обратиле пред присутните, изразувајќи поддршка за протестното движење и за граѓаните на Албанија.