Иако официјалната сезона на традиционалниот преспански јаболкобер започна, магацините во Преспа остануваат празни. Како што објави Телма, земјоделците одбиваат да го берат родот поради понижувачката откупна цена од едвај 4 денари за килограм индустриско јаболко, износ што не покрива ниту дел од основните трошоци за работна рака.

Математиката на терен е неодржлива: за да се исплати само дневницата на еден берач, која достигнува околу 50 евра, производителот треба да набере и предаде дури 750 килограми јаболка.

„Цената на индустриското јаболко е 4 денари, а еден работник бара 50 евра. Со јаболката што ќе ги собереме не можеме ниту работниците да ги платиме. Никој не предава. Ниска е и цената на конзумното јаболко, само 15 денари, додека лани индустриското одеше по 10 до 11 денари, а конзумното меѓу 25 и 30 денари“, изјави за Телма овоштарот Кире Карапалевски.

Покрај ценовниот колапс, годинава реколтата претрпе сериозни штети од пролетните мразеви и градот, со што вкупниот принос е преполовен и се очекува да тежи скромни 50 до 60 илјади тони. Дополнителен удар за егзистенцијата на производителите претставуваат и заостанатите, неисплатени субвенции од минатата реколта.

Иако на отворањето на манифестацијата надлежните ветуваа сигурност преку договорен откуп и навремени исплати, преспанските земјоделци посочуваат дека на терен останаа само празните ветувања и фотографирањето на функционерите. Без итна интервенција од државата и покачување на откупната цена, голем дел од годинешниот род ризикува да скапе на гранките.

„Дојдоа за јаболкоберот, го одржаа, се сликаа, не кажаа ништо. Сите овоштари ги чекаа да кажат нешто за тие два денари субвенции за килограм јаболко. Не знам како ќе се издржи оваа берба без исплатени субвенции“, вели Карапалевски.