Движењето Самоопределување на премиерот во заминување Албин Курти е во водство на вонредните парламентарни избори во Косово, покажуваат прелиминарните резултати на Централната изборна комисија (ЦИК) врз основа на обработени 97,76 проценти од гласачките места.
Според објавените податоци, Самоопределување освои 43,03 проценти од гласовите, односно 294.251 глас, што е помалку во споредба со изборите од декември 2025 година кога партијата доби 49,34 проценти од поддршката.
На второто место се најде Демократската партија на Косово (ДПК) со 21,15 проценти или 144.618 гласови, додека трета е Демократската лига на Косово (ЛДК) со 17,68 проценти или 120.870 гласови. Алијансата за иднината на Косово (АИК) освои 7,22 проценти, односно 49.345 гласови. Најсилната српска политичка партија во Косово, Српска листа, освои 5,89 проценти или 40.291 глас и, според податоците на ЦИК, забележа убедлива победа во сите општини со српско мнозинство.
Другата српска партија која учествуваше на изборите, „За слобода, правда и опстанок“, освои 0,73 проценти или 4.962 гласа. Според податоците на ЦИК, дел од нејзините гласови доаѓаат и од општини со албанско мнозинство, меѓу кои Призрен и Ѓаковица. Членот на претседателството на Српска листа, Игор Симиќ, изјави дека партијата ги освоила сите десет мандати предвидени за српската заедница во средините каде Србите се мнозинство, но обвини дека повторно се прават обиди еден пратенички мандат да му припадне на Ненад Рашиќ.
Прелиминарните резултати сè уште не ги вклучуваат гласовите од условните гласачки места, гласачите со посебни потреби и дијаспората. Излезноста на изборите изнесуваше 36,88 проценти, што е околу осум процентни поени помалку во споредба со изборите од декември 2025 година. Најголема излезност е регистрирана во општините со српско мнозинство. Собранието на Косово има 120 пратенички места, од кои 10 се загарантирани за српската заедница, 10 за другите немнозински заедници, додека за преостанатите 100 места се натпреваруваат политичките партии од албанскиот политички блок.
Ова се трети парламентарни избори во Косово во период од помалку од две години, по редовните избори во февруари 2025 година и вонредните избори во декември истата година, откако по претходниот изборен циклус не беше формирана нова влада.
