Денеска со почеток во 18.30 часот, свечено беше отворена петтата, јубилејна конференција „Наука за деца“, во организација на Фондацијата „Кантарот“.

Овогодинешното издание, што се одржува на 6 и 7 ноември е посветено на македонската наука, нејзините достигнувања и потенцијалот што го носат домашните научници, истражувачи и млади таленти. Под мотото „Правиме ПРОстор за МАкедонска идеЈА“ или скратено „Правиме промаја“, конференцијата има амбиција да ги доближи научните приказни до децата, да ги инспирира да истражуваат и да им покаже дека големите научни идеи може да потекнат и од Македонија.

Посебен акцент на свеченото отворање беше ставен на предавањата на стипендистите што своите истражувања ги развиваат во соработка со реномирани македонски научници. Нивни ментори се истакнати научници со меѓународна кариера: проф. Светлана Мојсов, проф. Панче Наумов, проф. Петар Поповски и проф. Христијан Ѓорески.

Во рамките на свеченоста беа доделени и две значајни признанија; наградата „Иван Ќостаров“ за извонреден научен потенцијал и наградата „Колега Стиков“ за најдобар млад презентер. Со нив се препознаваат и поттикнуваат љубопитноста, посветеноста, истражувачкиот дух и способноста на младите да ги споделуваат своите идеи.

Вториот ден од конференцијата, сабота, 7 ноември, ќе биде посветен на научни активности и интерактивни работилници за децата, со можност преку практично искуство, истражување и креативност да ја доживеат науката на поинаков начин.

„Нашата цел не е само да им ја доближиме науката на децата, туку да им помогнеме да се препознаат себеси како нејзини идни создавачи. Македонија има извонредни научници, поединци што работат на врвни истражувања и постигнуваат резултати на светско ниво. Сакаме нивните приказни да станат видливи и овде, дома, и да покажеме дека научната кариера не е нешто далечно или недостижно. Кога на едно дете ќе му дадете можност, поддршка и вистински ментор, ќе го поттикнете на критичко размислување и поттикнување на љубопитноста како основа за учење и напредок,можете да му отворите сосема нов свет“, истакнува Никола Стиков, коосновач на Фондацијата „Кантарот“.

Особено важна е и заложбата за вклучување на децата од руралните средини, преку научните каравани и активности со кои науката се носи директно во училиштата, но и преку обезбедување можности овие деца да учествуваат на настани како конференцијата во Скопје.

Петтата конференција „Наука за деца“ е уште една потврда дека вложувањето во знаење, младите таленти и научната мисла е вложување во иднината на целото општество. Зашто, можеби следната голема македонска научна идеја веќе постои, потребно е само да ѝ дадеме фронт да се развие.