Американското Министерство за одбрана објави четврти пакет декласифицирани материјали за неидентификувани аномални појави (UAP), попознати во јавноста како НЛО. Објавата е дел од иницијативата PURSUE, преку која американската влада постепено ги објавува архивските материјали поврзани со неидентификувани воздушни и вселенски појави.
Новиот пакет, објавен на 10 јули 2026 година, содржи 227 мегабајти документи и 1,4 гигабајти видеоснимки.
Што содржат новите досиеја?
Меѓу објавените материјали има: декласифицирани документи, фотографии, рачно изработени скици, инфрацрвени видеоснимки и архивски материјали од американски владини институции. Меѓу поинтересните документи е декласифицирано писмо на Американската комисија за атомска енергија од 22 март 1949 година, кое се однесува на конференција за необични воздушни појави.
Објавена е и страница од документ со рачно нацртана скица на цилиндричен објект, означен како „Fig. 8“, како и црно-бела фотографија од експериментално летало со делта-крила, кое претходно било означено како доверливо.
Инфрацрвени снимки и фотографии од орбитата
Во пакетот се вклучени и повеќе инфрацрвени видеоснимки. На нив се забележуваат објект што потсетува на шесткрака ѕвезда, аномалија над облаци, две области со необичен контраст регистрирани од воени сензори, необјаснета појава над водена површина.
Објавени се и три фотографии од неидентификуван објект во ниската Земјина орбита, снимени во 1996 година од американскиот вселенски шатл „Колумбија“.
Случај од Европа сè уште без објаснување
Меѓу новите материјали се наоѓа и досието PR-011, кое се однесува на случај регистриран во Европа во 2021 година. Станува збор за инфрацрвена снимка долга две минути и осум секунди, направена од американска воена платформа. Анализата покажува присуство на физички објект, но неговата природа сè уште не е утврдена.
Од Пентагон нагласуваат дека во архивата се објавени нерешени случаи, односно случаи за кои американските власти во моментов немаат доволно докази за да донесат конечен заклучок за природата на забележаните појави. Според Министерството за одбрана, нови материјали ќе бидат објавувани постепено, откако ќе бидат пронајдени, анализирани, декласифицирани и подготвени за јавноста.
Американскиот министер за одбрана Пит Хегсет изјави дека објавувањето на документите е дел од заложбата на администрацијата на претседателот Доналд Трамп за поголема транспарентност.
„Овие досиеја, кои со години беа скриени зад ознаките за тајност, долго време поттикнуваа оправдани шпекулации. Време е американската јавност самата да ги види“, изјави Хегсет.
