Неколку улици во њујоршката населба Менхетен беа евакуирани за време на утринскиот сообраќаен шпиц, откако зграда во реконструкција покажа сериозни знаци на можна конструктивна нестабилност. Градоначалникот на Њујорк, Зохран Мамдани, изјави дека два носечки столба се свиткале, додека на подовите биле забележани повеќе пукнатини и вдлабнувања.

„Зградата и натаму е нестабилна. Откако пристигнавме на местото на настанот, забележавме дополнително поместување на еден од ослабените столбови“, изјави Мамдани на прес-конференција.

Тој нагласи дека ситуацијата е исклучително сериозна, но потврди дека засега нема пријавени повредени и дека сите работници биле успешно евакуирани и се на безбедно. Инженерски тимови во моментов работат на план за итно зацврстување на конструкцијата со цел да се спречи евентуално уривање.

Од друга страна, инвеститорот на објектот соопшти дека, според нивните проценки, не постои опасност од колапс на целата зграда, реагирајќи на претходните предупредувања од њујоршката противпожарна служба. Надлежните служби ја обезбедуваат областа, а евакуацијата и ограничувањата за движење ќе останат во сила додека не завршат деталните проверки на стабилноста на објектот.