Пaкистанскиот министер за внатрешни работи Мохсин Накви пристигна во Иран со цел да разговара со иранското раководство за продолжување на преговорите со САД, кои треба да се одржат во Швајцарија. Според провладината иранска новинска агенција Mehr, Накви најпрво слетал во светиот град Машхад, на североистокот од земјата.

За време на посетата се очекува да се сретне со клучни членови на иранскиот преговарачки тим, вклучувајќи го претседателот на парламентот Мохамад Багер Галибаф и министерот за надворешни работи Абас Арагчи. Пакистан од април официјално делува како посредник во конфликтот меѓу Иран и САД.

60 дена за договор

Вашингтон и Техеран претходно оваа недела постигнаа рамковен договор со кој се повикува на прекин на непријателствата во регионот и обновување на комерцијалниот сообраќај низ Ормускиот теснец. Дополнителните преговори за спорни прашања, меѓу кои и иранската нуклеарна програма, треба да се одржат во рок од 60 дена.

Првиот круг преговори во Швајцарија првично бил закажан за петок, но бил откажан поради нови судири меѓу израелската армија и проиранската група Хезболах во Либан. Во рамки на преговорите, Иран бара значителна помош за обнова. Се споменува фонд од најмалку 300 милијарди долари, но финансирањето сè уште не е договорено. Техеран исто така бара укинување на банкарските санкции за повторно да добие пристап до меѓународниот финансиски систем и да може легално да извезува нафта.

Иран останува на ставот дека нема да има конечен договор без исполнување на овие услови. Американскиот претставник Стив Виткоф и иранскиот министер за надворешни работи Абас Арагчи треба да патуваат во Швајцарија на преговори, објави Ројтерс повикувајќи се на Axios.

Американскиот потпретседател Џ. Д. Венс ги откажал плановите за патување поради зголемените тензии во Либан, додека Израел и Хезболах продолжуваат со судири. По воспоставувањето примирје, Виткоф сепак ќе отпатува во Швајцарија, каде ќе му се придружи и Џаред Кушнер, додека иранската страна ќе ја предводи Арагчи.