Корисници ширум светот денес пријавуваат проблеми со платформите на компанијата Meta, откако Facebook, Messenger, Instagram и WhatsApp почнаа да работат со прекини или целосно да бидат недостапни за дел од корисниците.
Според бројни пријави на платформите за следење на интернет-сервиси, проблемите започнале во попладневните часови и брзо се прошириле на повеќе земји. Корисниците се жалат дека не можат да ги освежат содржините на Facebook и Instagram, дека Messenger не ги испраќа пораките, а дел од корисниците имаат проблеми и со WhatsApp.
Во дел од случаите, корисниците биле автоматски одјавени од своите профили и не можеле повторно да се најават, додека други пријавиле дека апликациите се вчитуваат исклучително бавно или воопшто не функционираат.
Засега од Meta нема официјално објаснување за причините за прекинот, ниту проценка кога сервисите ќе бидат целосно стабилизирани. Компанијата сè уште не објавила детали за можниот технички проблем што ги зафатил нејзините најпопуларни платформи.
Ваквите прекини не се невообичаени за технолошкиот гигант. Бидејќи Facebook, Messenger, Instagram и WhatsApp користат дел од истата инфраструктура, дефект во еден сегмент од системот често предизвикува проблеми и кај останатите услуги.
Корисниците во меѓувреме масовно се префрлија на други социјални мрежи за да проверат дали проблемот е глобален, додека службите на Meta работат на отстранување на прекинот и враќање на сервисите во нормална функција.
