За време на летните горештини, покрај доволниот внес на вода, и исхраната може да помогне во спречување на дехидрацијата.

Нутриционистите препорачуваат сезонско овошје богато со вода, витамини и минерали, кое му помага на организмот полесно да се справи со високите температури.

Лубеницата и дињата се најдобар избор

Најдобар избор се лубеницата и дињата, кои содржат повеќе од 90 проценти вода.

Освен што освежуваат, тие содржат и калиум, витамин Ц и антиоксиданси, кои се важни за организмот во летниот период.

Добра опција се и цитрусите – портокали, грејпфрут и мандарини, кои дополнително го снабдуваат организмот со витамин Ц.

Јагоди, праски и бобинки за повеќе свежина

Се препорачуваат и јагоди, боровинки, малини и капини, како и праски, бидејќи содржат многу вода, растителни влакна и хранливи материи.

Овие овошја се лесни за консумирање во текот на денот и можат да бидат добар избор за ужина во периоди на високи температури.

Овошјето не ја заменува водата

Сепак, експертите нагласуваат дека овошјето не може да ја замени водата.

Во периоди на високи температури потребно е редовно да се внесуваат течности, а да се избегнуваат засладени пијалаци и алкохол.