За многумина хотелската соба значи само едно – конечно да се одморат по патувањето. Но, искусните членови на кабинскиот екипаж имаат поинаква навика. Пред да го отворат куферот и да се сместат, тие поминуваат една до две минути во брза проверка на просторот.
Оваа рутина, која ја практикуваат многу стјуардеси поради честите престои во различни хотели, има едноставна цел – да се уверат дека собата е безбедна и дека знаат како да реагираат доколку се случи нешто непредвидено.
Првото нешто што го прават е брзо разгледување на целата соба. Вратата може да остане отворена додека се проверуваат просторот, бањата и другите делови од собата. Се проверува и дали сè изгледа нормално и дали собата е уредна.
Следниот чекор е проверка на местата каде што некој би можел да се скрие или кои не се видливи веднаш при влегувањето. Тоа се бањата, туш-кабината, кадата, плакарите, просторот зад завесите и под креветот. Не станува збор за долга инспекција, туку за брзо уверување дека просторот е празен и дека нема нешто необично.
Особено важно е веднаш да се утврди каде се наоѓа најблискиот излез за итни случаи. На вратата од хотелската соба најчесто има план на катот, а искусните патници советуваат да се погледне дали од собата треба да се оди лево или десно и колку врати има до скалите. Во случај на пожар или друга итна ситуација, тоа може да биде многу важно бидејќи тогаш нема време за првпат да се разгледува планот.
Потоа следува проверка на бравите. Вратата треба целосно да се затвора и заклучува, а истото важи и за прозорците. Треба да се проверат и дополнителните механизми, како сигурносниот синџир или засувот. Доколку нешто не функционира, најдобро е веднаш да се побара помош од хотелот.
Корисно е да се провери и хотелскиот телефон. Во случај мобилниот телефон да биде без батерија или да не функционира, важно е да знаете како да ја добиете рецепцијата или службите за итни случаи.
Стјуардесите советуваат и да не се отвора врата на лице кое неочекувано ќе се појави и ќе се претстави како хотелски персонал, без претходно да се провери неговиот идентитет. Најлесно е прво да се контактира рецепцијата и да се потврди дека лицето навистина е испратено во собата.
За дополнително чувство на сигурност, особено кога се патува сам, некои патници користат пренослив аларм или клин за врата. Тие можат да послужат како дополнителна заштита, но не се замена за исправна хотелска брава.
Како уште еден практичен совет се издвојува и малата батериска ламба, која може да биде корисна доколку дојде до прекин на струјата или друга непредвидена ситуација.
Целта на оваа рутина не е патувањето да се претвори во причина за страв, туку за само една или две минути да се запознаете со просторот, да знаете каде се излезите и да се уверите дека вратата е безбедно заклучена. Потоа можете мирно да го оставите куферот, да се опуштите и да уживате во престојот.
