Детали за пријавување:
- Краен рок за аплицирање: 15 мај 2025 година.
- Аплицирајте со краток опис на вашето учество и соодветни фотографии од делата на електронските адреси: gorjan@mkc.mk и info@mkc.mk.
- Потребно е да се аплицира со делата на најмногу двајца студенти под менторство на професор.
За изложбата: Изложбата „ПРОФЕСОРИ И СТУДЕНТИ“ претставува клучна платформа за поврзување на младите творци со нивните ментори, истакнувајќи ги сличностите, влијанијата и разликите во нивната уметничка продукција. Целта е да се презентира креативниот процес на студентите и нивните професори преку различни стилови и жанрови, како сликарство, графика, скулптура, фотографија и дизајн.
Проектот ја отвора можноста за дебата и размислување за правците во кои се движи македонската уметност, додека истовремено нуди простор за соработка и размена на идеи меѓу студентите и професорите. Преку оваа изложба, публиката ќе има можност да се запознае со новите генерации уметници и нивниот напредок во креативната сфера.
Изложбата ќе вклучува професори и студенти од различни академски институции, како што се Факултетот за ликовни уметности при УКИМ, Ликовната академија при УГД, и приватните институции како Школата за дизајн и уметност „Скала“ и Европскиот универзитет во Скопје, меѓу други.
„ПРОФЕСОРИ И СТУДЕНТИ“ не е само одлична можност за студентите да ги презентираат своите дела, туку и за ширење на уметничката култура и поттикнување на креативноста преку јавни изложби. Оваа изложба создава простор за културни дискусии и интеракција, а истовремено го поттикнува растот на новите уметници.
Отворањето на изложбата е планирано за 17 јуни 2025 година, а ќе трае до 30 јуни 2025 година.
