Организаторот на изложбата за оружје во близина на Киев, која беше цел на руски напад со балистички проектили во петокот, е во 60-дневен притвор, соопштија украинските власти. Во нападот врз собирот на претставници на украинската одбранбена индустрија загинаа 11 лица, а околу 100 беа повредени.

Васил Хончарук, претставник на здружението „Армада“ кое го организираше настанот, е изведен пред суд во Киев под обвинение за небрежност која предизвикала смртни последици. Судот му одреди 60-дневен притвор без право на кауција. Главниот обвинител Руслан Кравченко соопшти дека се отворени две кривични истраги: едната за можно кршење на законите и обичаите на војување, а другата за можна небрежност во организацијата и одржувањето на настанот.

Нападот покрена прашања за тоа како руските сили дознале за локацијата на овој јавен настан, кој се одржувал во приватен спортски комплекс. Портпаролот на Украинскиот совет на одбранбената индустрија за „Kyiv Independent“ изјави дека пред нападот не биле јавно достапни никакви податоци за настанот или за локацијата.

Тој тврди дека поканите се делеле исклучиво преку затворени канали, а информациите на интернет се појавиле дури по нападот. Ниту поканата, ниту линкот за регистрација не го откривале местото на одржување.