ОпенАИ наводно развива паметен телефон што би требало да донесе нов начин на користење вештачка интелигенција на мобилен уред, тврди аналитичарот Минг-Чи Куо. Според неговите информации, уредот би можел да влезе во масовно производство во 2028 година и да користи сопствен чип, развиван во соработка со „Квалком“ и „МедиаТек“.
Во извештајот се наведува дека уредот би бил фокусиран на таканаречена „агентска ВИ“, односно систем што не само што одговара на прашања, туку може да разбира контекст, да следи задачи и да помага во нивно извршување. Дел од функциите би се обработувале директно на уредот, додека посложените задачи би се извршувале преку облак.
Куо тврди дека „Лакшер“ би можел да биде ексклузивен партнер за ко-дизајн и производство на уредот. Според истиот извештај, ОпенАИ не планира класичен мобилен интерфејс базиран на апликации, туку нов систем во кој задачите и нивниот статус би се прикажувале директно на почетниот екран.
Најинтересниот дел од шпекулациите е дека телефонот би требало постојано да го разбира контекстот на корисникот. Тоа може да значи дека вештачката интелигенција би била подлабоко вградена во самиот уред, наместо да функционира само како уште една апликација.
Засега, сепак, станува збор за неофицијални информации. ОпенАИ официјално не најави паметен телефон, ниту потврди детали за чипсет, партнерства со производители или датум на лансирање.
Она што е официјално познато е дека ОпенАИ го спои тимот на „ио продактс“, хардверската компанија основана од Џони Ајв и неговите соработници, со својот тим. Во официјалната објава, Сем Алтман и Џони Ајв наведоа дека работат на нова генерација производи и дека целта е да се промени начинот на кој луѓето ја користат технологијата.
По тоа, во технолошката јавност се појавија повеќе шпекулации за можни уреди на ОпенАИ — од паметен звучник до нови лични ВИ-уреди. Дел од претходните информации сугерираа дека првиот уред на ОпенАИ и Џони Ајв нема да биде класичен нослив уред или слушалки, но конечната форма сè уште не е официјално позната.
Доколку информациите за паметен телефон се потврдат, тоа би значело дека ОпенАИ сака директно да влезе во еден од најконкурентните технолошки пазари, каде доминираат „Епл“, „Самсунг“ и големите производители на „Андроид“ уреди.
