Организацијата на земјите извознички на нафта OPEC+ постигна договор за ново зголемување на квотите за производство од август, се наведува во соопштението на групата. Со одлуката се предвидува зголемување на глобалната понуда во период кога цените на нафтата бележат пад поради промени на пазарот и постепено отворање на клучни трговски правци.

На онлајн состанок, членовите на ОПЕК+ се договорија од август да ги зголемат квотите за 188.000 барели дневно, што се надоврзува на претходни зголемувања во јуни и јули, пренесува Ројтерс. Седум клучни членки на групата, меѓу кои Русија и Саудиска Арабија, од април до јули веќе ги зголемија квотите за речиси 800.000 барели дневно.

Сепак, дел од ова зголемување не се реализираше во пракса поради геополитички тензии и нарушувања на пазарот, вклучително и конфликти на Блискиот Исток и ограничувања во поморските рути. Поради тоа, производството на ОПЕК+ се намали од 42,77 милиони барели дневно во февруари на 33,13 милиони барели во мај, според податоци на организацијата.

Во јуни започна постепено закрепнување на производството, благодарение на напорите на САД и други партнери за олеснување на извозот од земјите производители. И покрај тоа, цените на нафтата остануваат под притисок поради намален увоз од Кина, зголемен извоз од производители надвор од Блискиот Исток и користење на глобални резерви координирани од Меѓународната енергетска агенција.

Во меѓувреме, постигнат е и договор меѓу Вашингтон и Иран за намалување на тензиите и стабилизирање на снабдувањето со енергенси. ОПЕК+ во моментов ги сочинуваат 21 земја членка, а клучните одлуки за производство ги носи група од седум држави, меѓу кои се Саудиска Арабија, Русија, Ирак, Кувајт, Алжир, Казахстан и Оман.

Овие земји постепено ја враќаат продукцијата на нивоа договорени во 2023 година, со цел укинување на претходните ограничувања на пазарот.