Во културно-едукативниот центар Лабораториум на 11 јуни, со почеток во 20:00 часот, ќе биде отворена изложбата „Од шкафот“ на младата авторка Јана Наскова. Изложбата е прв јавен настан од иницијативата „Градски ѕид за Нови Лица на македонската културна сцена“, преку која Лабораториум поддржува млади уметници и креативци од независната сцена.

Фотографскиот проект е резултат на едномесечна резиденција, во која Наскова работела под менторство на реномираната фотографка Еџе Али. Во фокусот на проектот е урбаниот простор, но и личниот поглед на младата авторка кон градот, секојдневието и интимните слоеви на просторот што ја опкружува.

Прво „ново лице“ од програмата

Јана Наскова е родена во Скопје во 2001 година. Дипломирала интердисциплинарна програма по либерални уметности и науки во Амстердам, со фокус на филм, филозофија и литература. Нејзиниот досегашен ангажман се движи меѓу уметноста, младинските организации, образованието, медиумите и граѓанските иницијативи.

Токму таа меѓупросторна позиција се препознава и во нејзиниот авторски израз, кој не ја гледа фотографијата само како визуелен запис, туку и како личен наратив, општествена чувствителност и обид да се фати она што најчесто останува на рабовите на вниманието.

„Нови Лица“ како простор за младите автори

Проектот „Нови Лица“ има цел да открие, поддржи и промовира нови автори од македонската независна уметничка и креативна сцена. По јавен повик, стручно жири составено од културни работници, професори, уметници и професионалци избра осум млади автори и креативци кои до крајот на годината ќе поминат низ едномесечни менторски резиденции.

Секој од учесниците работи со искусен ментор, кој го следи и поддржува креативниот процес до создавање на ново авторско дело. Резултатите ќе бидат јавно презентирани во Лабораториум преку изложби, презентации и јавни настани.

Изложбата на Јана Наскова е прва во низата од осум настани што ќе се реализираат до крајот на годината, претставувајќи ја соработката меѓу младите автори и нивните ментори.

Лабораториум како сцена за независна култура

Лабораториум во изминативе две и пол години се профилираше како простор за независна култура, едукација, креативност и социјализација. Со повеќе од 550 реализирани настани, меѓу кои работилници, изложби, концерти, театарски претстави, креативни базари, кино-проекции и радио програми, центарот изгради активна заедница на млади уметници, креативци и проактивни граѓани.

Иницијативата „Нови Лица“ се реализира во рамки на проектот „Култура за развој“, поддржан од Владата на Швајцарија, а имплементиран од Хартефакт Фонд.

Изложбата е отворена за јавноста, а влезот е слободен.