Модерните лекови за слабеење кои во изминатиов период направија вистински бум во светот имаат еден голем недостаток – покрај мастите, тие често доведуваат и до сериозно губење на мускулната маса. Но, најновото научно откритие на угледниот Институт за наука „Вајцман“ нуди целосно нов биолошки пристап кој ветува ефикасно топење на масните наслаги, но со зачувување на здравите мускули. Научниците идентификуваа протеин наречен MTCH2, на кој му го дадоа прекарот „Мич“ (Mitch), а кој делува како главен контролор за тоа како клетките управуваат со енергијата. Најновата студија објавена во стручното списание „EMBO Journal“ покажува дека неговото деактивирање во човечките клетки драматично го забрзува согорувањето на мастите и јаглехидратите, а воедно поставува и блокада за создавање на нови масни клетки.

Тајната на ова откритие лежи во митохондриите – ситните структури во внатрешноста на клетките кои функционираат како нивни електрани и ја претвораат храната во корисна енергија. Во нормални услови, митохондриите се спојуваат во големи, ефикасни мрежи. Меѓутоа, кога научниците го отстраниле протеинот „Мич“, оваа мрежа се распаднала на помали единици. Ваквата промена ги направила клетките помалку ефикасни во производството на енергија, доведувајќи ги во состојба на постојан „енергетски глад“. За да го компензираат овој недостиг, клетките биле принудени драстично да ја зголемат потрошувачката на гориво, примарно согорувајќи ги резервите на масти. Научниците забележале енормно засилување на клеточното дишење, односно процес во кој клетката со помош на кислород црпи енергија директно од мастите и јаглехидратите.

Освен што ги тера постоечките клетки агресивно да ги трошат мастите, блокирањето на овој протеин спречува и понатамошно дебелеење, што е исклучително важно со оглед на тоа што претходните статистички податоци веќе покажаа дека кај луѓето кои се борат со дебелина, нивото на протеинот „Мич“ е значително покачено. Масните клетки во нашето тело се развиваат од незрели (прогениторни) клетки. Научниците откриле дека кога „Мич“ е исклучен, овие незрели клетки едноставно немаат доволно енергија и материјал за да созреат и да почнат да складираат масти, со што процесот на дебелеење е прекинат уште во самиот корен.

Претходните експерименти изведени на лабораториски глувци покажаа дека оние животни кои го немале овој протеин во мускулите биле значително послаби, имале многу поголема спортска издржливост и биле целосно отпорни на дебелеење. Иако ова истражување е сè уште во рана фаза и допрва треба да се развијат безбедни медикаменти за луѓе, научната јавност е возбудена бидејќи доколку се развие терапија која го таргетира „Мич“, тоа ќе значи нова генерација третмани против дебелина кои ќе овозможат ефикасно слабеење, без притоа пациентите да ја изгубат силата и здравата мускулна маса.