Институтот за јавно здравје отвори психолошко советувалиште за деца и адолесценти – прво од ваков вид во земјата, преку кое стручни тимови ќе обезбедуваат поддршка и советување за деца, тинејџери, родители и наставници.

Пристапот до услугите ќе биде возможен со упат од матичен лекар преку системот „Мој термин“. Советувалиштето започнува со работа од понеделник, а неговата цел е да обезбеди организирана институционална поддршка за емоционални, семејни, училишни и лични предизвици со кои се соочуваат младите.

Отворањето на советувалиштето доаѓа во период кога менталното здравје на младите сè почесто се третира како клучна јавноздравствена тема, со акцент на превенција, рано препознавање на проблемите и навремена интервенција. На настанот беше истакнато дека услугата ќе биде интегрирана во редовниот здравствен систем преку „Мој термин“, со што пристапот до психолошка поддршка станува поорганизиран и подостапен.