Европските берзански индекси денеска се нерамномерни, додека цената на нафтата од типот „брент“ повторно порасна на речиси 105 долари за барел, по новите геополитички тензии на Блискиот Исток. Американскиот претседател Доналд Трамп изјави дека одговорот на Иран на американскиот предлог за завршување на конфликтот е „неприфатлив“, што дополнително влијаеше врз растот на цените.

„Токму го прочитав одговорот на таканаречените ирански ‘претставници’. Не ми се допаѓа – целосно е неприфатлив“, напиша Трамп на социјалните мрежи.

Раст на цените на нафтата и гасот

Според берзанските податоци цената на суровата нафта порасна за 3,48% на 98,731 долари за барел, нафтата „брент“ порасна за 3,48% на 104,837 долари за барел. Пазарите реагираат на зголемената неизвесност околу евентуалното намалување на тензиите меѓу Вашингтон и Техеран.

Иранските власти бараат од САД прекин на воените дејствија на сите фронтови и укинување на санкциите, според иранската агенција Тасним, која се повикува на информиран извор.

На почетокот на тргувањето на амстердамската берза TTF, фјучерсите за европскиот гас за јуни се тргуваа по цена од 44,925 евра за мегават-час. Пазарните аналитичари предупредуваат дека енергетските цени остануваат чувствителни на геополитичките случувања на Блискиот Исток.