Потрагата по новиот Џејмс Бонд влегува во решавачка фаза. Според извештаите на филмските медиуми, „Амазон МГМ“ подготвува завршни пробни снимања што би можеле да почнат на 23 октомври и да продолжат следната недела.

Меѓу кандидатите се споменуваат Калум Тарнер, Џек Лоуден и Џош О’Конор. Сепак, листата можеби не завршува со нив: според „Радио тајмс“, повикувајќи се на медиумските извештаи, во завршниот круг има четворица актери, а три имиња се познати во јавноста.

Новиот филм ќе го режира Дени Вилнев, а изборот на актерот го води кастинг-директорката Нина Голд. Оној што ќе ја добие улогата ќе го наследи Даниел Крег и ќе го отвори следното поглавје на една од најпознатите филмски франшизи.

Засега, смокингот останува без официјален сопственик. Пробните снимања се чекор кон одлуката, но ниту едно од споменатите имиња не е потврдено како новиот Бонд.