Грција воведува старосна граница за пристап до социјалните мрежи, со образложение дека е потребна поголема заштита на здравјето и безбедноста на децата. Законот е усвоен, но забраната нема да се применува веднаш.

Премиерот Киријакос Мицотакис порача дека технолошките компании имаат околу два и пол месеца да подготват начин за проверка на возраста што истовремено ќе ја штити приватноста на корисниците.

Според грчката влада, целта е да им се помогне на родителите да го ограничат бескрајното скролање што им одзема на децата време за спиење, концентрација и дружење. Грција е меѓу седумте членки на ЕУ што со Европската комисија бараат решение за проверка на возраста.

Начинот на спроведување останува едно од главните прашања. Во дебатата пред гласањето, опозициските партии отворија дилеми за ефикасноста на целосната забрана, заштитата на личните податоци и можноста правилата доследно да се применуваат.