Компанијата „Нотинг“ (Nothing) наскоро би можела да ја прошири својата понуда со паметни очила и да влезе во директна конкуренција со моделите на „Мета“. Според информациите што ги објави познатиот технолошки инсајдер Роланд Квант, компанијата на Карл Пеи моментално развива два модела што ќе се разликуваат според функциите и намената.

Првиот модел наводно ќе биде понапреден и ќе има вградена камера и поддршка за функции на вештачка интелигенција, вклучително и интеграција со ЧетГПТ и можности за преведување. Вториот модел ќе биде поедноставен, без камера, но со вградени звучници и микрофон за слушање музика, аудиокниги и користење гласовен асистент.

Очилата ќе се затемнуваат на сончева светлина

Според неофицијалните информации, двата модела би требало да имаат фотохроматски леќи, кои автоматски се затемнуваат кога се изложени на сончева светлина. Таквото решение би им овозможило на корисниците да ги носат очилата во различни светлосни услови без постојано да менуваат очила.

Засега нема информации кога „Нотинг“ би можел официјално да ги претстави новите уреди, колку би чинеле и на кои пазари би биле достапни. Не се објавени ниту фотографии од очилата, а компанијата сè уште не потврдила дека работи на нивниот развој.

Затоа, засега станува збор за непотврдени информации, а не за официјално најавен производ.