Осум лица се водат како исчезнати откако утринава избувна пожар на брод под знаме на Сан Марино во близина на романскиот брег на Црното Море. Инцидентот со бродот „Wide Trader“ се случи на околу 13 наутички милји југоисточно од градот Сулина. Спасувачките тимови со брод и хеликоптер веднаш започнаа потрага по преживеаните, додека серијата напади во поморските коридори на Црното Море отвора сериозен безбедносен аларм за поморскиот сообраќај долж границите на НАТО.
Пожарот на бродот „Wide Trader“ избувнал околу 7:00 часот наутро. Според официјалното соопштение на Романската поморска управа, на пловилото имало вкупно 12 лица. Четири члена на екипажот се на безбедно, додека осуммина се водат како исчезнати во водите на Црното Море.
Во акцијата за пребарување и спасување се вклучени специјализиран спасувачки брод и хеликоптер. Романските власти засега не потврдуваат дали пожарот е директна последица од напад со дрон, но локацијата на инцидентот се наоѓа во исклучително чувствителна поморска зона каде што сообраќајот се одвива под постојан ризик.
Овој настан следува само еден ден откако Романија соопшти дека истражува можен напад со дрон врз танкерот „Yara J“, кој пловел под знамето на Коморските Острови. На тој брод исто така избувна пожар, но екипажот успеа сам да го изгасне огнот без човечки жртви.
Романскиот министер за одбрана, Раду Мируца, изјави за телевизијата „Диги24“ дека се води детална истрага за потеклото на ударот.
„Без оглед на тоа дали бродот бил погоден од дрон или не, истрагата е во тек. Ова е прашање од исклучителна тежина, со оглед на тоа што вакви инциденти се случуваат во романските територијални води“, рече Мируца.
Сомнежите за воени дејствија врз цивилни бродови не се ограничени само на романскиот брег. Официјална Софија соопшти дека четири бродови беа цел на напади во изминатите денови во и околу бугарската ексклузивна економска зона, при што два пловила потонаа. Еден од потонатите бродови е товарен брод регистриран во Гвинеја-Бисао, а вториот е „Челзи-3“, во сопственост на украинска компанија од Одеса, регистриран под знамето на Малта.
Бугарскиот премиер Румен Радев пред парламентот посочи дека логиката на нападите упатува кон руска одговорност, бидејќи исходот оди во прилог на Москва, иако во моментов нема директни докази за вината. Бугарија веќе побара меѓународна помош и поддршка од НАТО за зајакнување на надзорот и одбраната од напади со беспилотни летала.
Само во првите осум месеци од оваа година на Црното Море беа погодени најмалку 163 цивилни и трговски бродови, покажуваат податоците на турската поморска комора ИМЕАК. Бројките потврдуваат дека ризикот од воениот конфликт директно ги зафаќа комерцијалните коридори од кои зависат земјоделските и енергетските текови кон југоисточна Европа и Балканот.
