НАСА официјално го објави составот на екипажот за мисијата Artemis III, една од најамбициозните и технолошки најсложени вселенски операции во современата историја. Мисијата, која е планирана за 2027 година, претставува важен чекор во подготовките за враќање на луѓето на Месечината и за идните човечки мисии кон Марс.

Четиричлениот екипаж ќе го предводи астронаутот Ренди Бресник како командант на мисијата. Пилот ќе биде италијанскиот астронаут Лука Пармитано од Европската вселенска агенција (ESA), додека Френк Рубио и Андре Даглас ќе учествуваат како специјалисти на мисијата. Резервен член на екипажот е астронаутот Боб Хајнс.

За Бресник и Пармитано ова ќе биде трет лет во вселената, додека Рубио веќе е познат по својата рекордна едногодишна мисија на Меѓународната вселенска станица. За Андре Даглас ова ќе биде прво патување во вселената.

Главната задача на Artemis III нема да биде слетување на Месечината, туку тестирање на комплексни операции во орбитата на Земјата кои ќе бидат неопходни за идните лунарни мисии. Според планот, ракетата SLS ќе го лансира вселенскиот брод Orion со екипажот во орбита, каде првпат ќе се извршат маневри за спојување со експериментални лунарни летала развиени од компаниите Blue Origin и SpaceX.

Прво во орбитата ќе биде испратен лунарниот лендер Blue Moon на Blue Origin, по што астронаутите ќе спроведат тестови на системите и процедурите за поврзување на леталата. Потоа ќе следуваат дополнителни тестирања со лунарната верзија на Starship на SpaceX, вклучувајќи проверки на комуникациските системи, погонските технологии и трансферот на екипажот меѓу леталата.

Посебно внимание привлече назначувањето на Лука Пармитано, кој стана првиот астронаут на Европската вселенска агенција официјално вклучен во програмата Artemis. Од НАСА нагласуваат дека Artemis III е подготовка за мисијата Artemis IV, која е планирана за 2028 година и треба да го отвори патот за првите човечки мисии кон јужниот пол на Месечината.

Крајната цел на програмата Artemis е воспоставување долгорочно човечко присуство на Месечината, развој на нови технологии за живот и работа во длабоката вселена и создавање основа за идните мисии со човечки екипаж кон Марс.