Американската вселенска агенција НАСА, заедно со приватните компании СпејсИкс и „Блу Ориџин“, ги приспособува дизајнот и оперативните планови на леталата што треба да превезуваат астронаути до површината на Месечината. Целта е да се забрза развојот и да се овозможи враќање на човечки екипаж на Месечината до 2028 година.

Во рамките на изменетата мисија „Артемис 3“, следната година е планирано тестирање на спојувањето и приклучувањето на пробните верзии на двете лунарни летала со вселенскиот брод „Орион“, во ниската орбита околу Земјата.

Компаниите истовремено развиваат верзии на своите летала за превоз на астронаути и за транспорт на товар, наменети за идните мисии.

До Месечината со „Орион“

Астронаутите на почетните мисии кон Месечината ќе тргнуваат со вселенскиот брод „Орион“, кој ќе биде лансиран со ракетата СЛС од Вселенскиот центар Кенеди на Флорида.

Во текот на секоја мисија, комерцијалното летало за слетување ќе се спои со „Орион“ и ќе пренесе двајца членови на екипажот до површината на Месечината. Другите двајца астронаути ќе останат во „Орион“.

За да се забрза развојот и да се постигне целта за слетување до 2028 година, НАСА се откажува од претходно планираното спојување во таканаречената речиси праволиниска орбита на хало (НРХО). Наместо тоа, ќе се користат орбити приспособени на плановите на секој од двата партнера.

Како ќе функционира планот на СпејсИкс?

Планот на СпејсИкс се потпира на дополнување гориво во ниската орбита околу Земјата. Серија танкери што ќе летаат во вселената ќе пренесуваат криогено гориво во резервоар, од кој потоа ќе се полни лунарната верзија на „Старшип“.

Според ревидираниот план, лунарното летало „Старшип ХЛС“ ќе го чека „Орион“ во Земјината орбита. Двете летала ќе се спојат, по што „Старшип“ ќе изведе маневар за насочување кон Месечината.

Лунарното летало треба да однесе двајца астронаути на површината на Месечината, каде што ќе престојуваат неколку дена. Потоа ќе ги врати до „Орион“, со кој ќе се упатат назад кон Земјата.

Според планот, директното преминување во ниска орбита околу Месечината ќе ја намали количината гориво што „Старшип“ треба да ја преземе во вселената и ќе го скрати времето потребно за повторно спојување со „Орион“.

Измените се дел од напорите на НАСА и приватните партнери да ги поедностават сложените операции и да го забрзаат развојот на системите неопходни за враќање на астронаутите на Месечината.