Ако сакате повеќе енергија, подобра концентрација и помала потреба од кафе во текот на денот, можеби е време да го промените распоредот на оброците. Нутриционистите советуваат најобилниот оброк да биде појадокот, а не ручекот или вечерата.

Според експертите, телото во утринските часови најдобро ја преработува глукозата, бидејќи тогаш е најчувствително на инсулин. Тоа значи дека храната поефикасно се претвора во енергија, што придонесува за подобар фокус, поголема продуктивност и стабилно ниво на енергија во текот на денот.

Обилниот и избалансиран појадок, кој содржи сложени јаглехидрати, протеини и здрави масти, обезбедува подолготрајно чувство на ситост и помага во контролата на апетитот. Истражувањата покажуваат дека луѓето кои редовно појадуваат имаат помала веројатност да чувствуваат силен глад попладне и поретко посегнуваат по нездрави грицки.

Дополнително, организмот троши повеќе енергија за варење на обилен утрински оброк отколку на ист таков оброк изеден навечер. Од друга страна, доцните и тешки вечери можат да го нарушат циркадниот ритам, да го влошат квалитетот на сонот и да предизвикаат замор следниот ден.

Експертите затоа препорачуваат поголемиот дел од дневните калории да се внесуваат во првиот дел од денот, додека вечерата да биде полесна. Таквиот начин на исхрана може да придонесе за подобар метаболизам, повеќе енергија и полесна контрола на телесната тежина.