Во израелски напади и пукање во Појасот Газа загинале најмалку пет лица, меѓу кои и едно дете, соопштија здравствени службеници. Во еден воздушен напад загинале четворица Палестинци, меѓу кои две жени и дете, кои се затекнале во станбена зграда во градот Газа, наведуваат истите извори.

Во напад врз зграда во населбата Сабра во градот Газа бил уништен стан, при што биле повредени уште неколку станари, додека во одделен инцидент израелските сили пукале и усмртиле жена во северниот град Беит Лахија. Израелската армија засега не ги коментирала овие настани.

Континуирано кршење на примирјето

Примирјето постигнато во октомври делумно придонело за намалување на големите судири меѓу Хамас и Израел, но не ги запрело израелските напади. Министерството за здравство во Газа соопшти дека од почетокот на примирјето во израелски напади загинале повеќе од 1010 Палестинци, додека во истиот период милитантите во Газа убиле четворица израелски војници.

Израел тврди дека нападите се насочени кон спречување на планирани акции на Хамас и други милитантни групи. Хамас, пак, ретко објавува податоци за загинати свои борци. Во меѓувреме, заглавени се преговорите околу следната фаза од планот на Доналд Трамп за Газа, кој предвидува разоружување на Хамас и повлекување на израелските сили.