Цените на нафтата на светските пазари денеска забележаа пад по информациите дека Катар и Пакистан предложиле нова иницијатива за обновување на преговорите меѓу САД и Иран. Северноморската нафта „брент“ поевтини за околу еден процент, на речиси 108 долари за барел, додека американската сурова нафта ВТИ се спушти на околу 98 долари.

Според податоците што ги пренесува „Трејдинг економикс“, цената на ВТИ останува блиску до највисокото ниво во последните четири недели, откако минатата недела порасна за околу 10 проценти.

Новите дипломатски напори за обновување на преговорите и ставање крај на војната во Иран ги поттикнаа очекувањата дека би можело да дојде до смирување на конфликтот и подобрување на снабдувањето со нафта.

Сепак, неизвесноста останува висока. Извештаите за пад на саудиски хеликоптер во близина на границата со Јемен, нападите на јеменските Хути врз важниот извозен терминал Јанбу и погодените два танкера во Персискиот Залив повторно ги отворија прашањата за безбедноста на транспортот на нафта од регионот.

Евентуалното продолжување на нападите или нарушувањето на поморскиот сообраќај би можеле да го загрозат обновувањето на испораките и повторно да извршат притисок врз цените.

Пазарите внимателно ги следат дипломатските иницијативи, но и случувањата на теренот. Иако надежите за преговори донесоа краткотрајно олеснување, идното движење на цените ќе зависи од тоа дали ќе има конкретен напредок кон прекин на конфликтот и стабилизирање на снабдувањето.