Сè повеќе туристи сакаат да пијат вода директно од чешма и да не се откажуваат од таа навика ниту на одмор. Но пред да наполните чаша вода во Грција, важно е да знаете дека нејзината безбедност не е иста во сите региони. Во големите градови како Атина и Солун, водата од чешма генерално се смета за безбедна за пиење, миење заби и готвење. Таму инфраструктурата е постабилна, а квалитетот на водата почесто ги исполнува стандардите за питка вода. Сепак, дури и во урбани средини, вкусот и квалитетот можат да варираат во зависност од локалната мрежа и состојбата на инсталациите во сместувањето.

Сосема поинаква е ситуацијата на дел од грчките острови. Таму водата може да има посолен, хлориран или изразито минерален вкус, а во одредени места се користи и десалинизација на морска вода. Затоа, не може да се генерализира состојбата за сите острови, условите зависат од конкретната локација и локалниот водоводен систем.

Иако водата понекогаш е технички безбедна, нејзиниот вкус не мора да значи дека е идеална за консумација. Мирисот, бојата и вкусот се прашање на прифатливост, но не секогаш и на здравствена исправност. Затоа експертите препорачуваат претпазливост, особено кај туристи со чувствителен желудник, деца и постари лица.

Во случаи на сомнеж, најбезбедна опција останува флаширана вода. Таа е препорачана и во помали места, постари објекти, на јахти или во ситуации кога дури и локалните жители ја избегнуваат водата од чешма.

За пиење, готвење или миење заби, водата од чешма во дел од Грција е сосема вообичаена практика, но туристите секогаш треба да се информираат на лице место, преку хотелот, домаќините или локалните препораки – за да избегнат непријатности за време на одморот.