На плажата Форест во австралиската држава Квинсленд се пронајдени шест мистериозни сребрени топки за кои се верува дека би можеле да потекнуваат од вселената, што предизвика истрага од надлежните служби.

Властите во Австралија, вклучително и Австралиска вселенска агенција, се обидуваат да утврдат од каде потекнуваат објектите и дали претставуваат потенцијална опасност.

Полицијата ја обезбеди областа

Објектите биле пронајдени северно од градот Таунсвил, а властите веднаш воспоставиле безбедносен периметар и забраниле пристап во радиус од 50 метри.

Според локалните служби за итни ситуации, постои сомнеж дека објектите би можеле да содржат опасни материјали, поради што се постапува со зголемени мерки на претпазливост. Истражители во заштитна опрема ги собирале објектите и ги транспортирале во специјални контејнери за анализа, додека се разгледува можноста тие да се делови од вселенски летала или резервоари од ракети.

На интернет веќе се појавија различни теории, но засега нема официјална потврда за нивното потекло.