Новиот албум на американската пејачка Мајли Сајрус, „Bass Persuades“, забележа историски пад на топ-листата Билборд 200. По дебито на првото место, изданието во втората недела се најде на 157. позиција. Ова претставува најголем пад од врвот што го забележала некоја музичарка во историјата на оваа листа.
Изданието „Bass Persuades“ е првиот проект на Сајрус за дискографската куќа Атлантик Рекордс откако претходно ја напушти Колумбија Рекордс. Почетните прогнози сугерираа дека албумот нема да влезе во првите пет, по што издавачот покрена масовна кампања. Центарот на стратегијата беа физичките изданија. Купувачите имаа на располагање 16 различни винилни верзии, девет верзии на ЦД, шест дигитални формати и една касета, додека цената на дигиталниот албум беше намалена.
Овој потег донесе резултат во првата недела. Сајрус стигна до првото место со предност од само 70 продадени примероци пред кантри пејачката Ела Ленгли и нејзиниот албум „Dandelion“. По повод резултатот, издавачката куќа и испрати на пејачката цветен аранжман во форма на бројот еден.
Додека Сајрус доживеа пад во втората недела, останатите поп ѕвезди ги задржаа високите позиции на Билборд. Тејлор Свифт се врати на првото место со албумот „Life of a Showgirl“, помогната од новото делукс издание „Encore“. Оливија Родриго е на второто место со „You Seem Pretty Sad For a Girl So In Love“, кој се наоѓа на листата веќе четири месеци. Албумот на Ела Ленгли падна само за една позиција и сега е трет, иако е објавен пред речиси шест месеци.
Сајрус го презеде неславниот рекорд од Селин Дион, чиј албум „Courage“ во 2019 година падна од првото на 111. место. Пред Дион, рекордот беше во сопственост на Мадона, чиј проект „Madame X“ своевремено се спушти на 77. позиција.
Сајрус го промовира новиот материјал со два распродадени концерта во Холивуд Боул овој месец. Пејачката нема одржано голема турнеја уште од 2014 година и преферира настапи на една локација. Интересот за двата концерта изнесуваше 1.5 милиони луѓе на листата на чекање, иако капацитетот беше ограничен на вкупно 18.000 влезници.
Во интервју со Зејн Лоу, пејачката ја објасни одлуката за изборот на локацијата. Таа истакна дека Холивуд Боул и одговара бидејќи и се потребни само десетина минути возење до дома.
„Листата на чекање ми покажа дека бев во право и дека луѓето ќе дојдат кај мене. Не морам јас да патувам кај вас. Тоа е докажано. Бидејќи ова беше тест. И победив“, изјави Сајрус.
