На сцената на Загрепскиот танцов центар вечерва ќе биде изведена танцовата претстава „АЈДЕ!“, во кореографија на македонските уметници Игор Киров и Бојан Мицев, во продукција на Motion Network. Настанот е дел од годишната програма на македонскиот Културно-информативен центар во Загреб.

Претставата е инспирирана од ромската култура и традиција и преку современ танцов израз обработува теми поврзани со љубовта, слободата, припадноста и општествените норми. Како инспирација е земен празникот Едерлези (Ѓурѓовден), кој симболизира радост, заедништво и нов почеток.

Гостувањето на „АЈДЕ!“ има за цел промоција на современото македонско уметничко творештво и зајакнување на културната соработка меѓу Македонија и Хрватска.

Продукцијата е поддржана од Министерството за култура и туризам, Општина Штип и ЕАМ Штип, а реализацијата на гостувањето се одвива во соработка со македонскиот КИЦ во Загреб, Motion Network и Загрепскиот танцов центар.

Изведбата започнува во 20 часот.