Македонската машка ракометна репрезентација обезбеди пласман на Светското првенство 2027 во Германија, откако вечерва во СЦ „Борис Трајковски“ убедливо ја совлада Словачка со 38:23 во реванш-баражот. По победата од 31:24 на првиот натпревар, Македонија со вкупни 69:47 го потврди новиот настап на ракометниот Мундијал.

Избраниците на Кирил Лазаров доминираа од почеток до крај и не ѝ дозволија на Словачка ниту да се доближи до изненадување. Македонија уште во првото полувреме создаде висока предност, во еден момент и од осум гола разлика, по што беше јасно дека билетот за Светското првенство е практично обезбеден.

Во второто полувреме македонските ракометари само ја зголемуваа предноста пред исполнетите трибини во „Борис Трајковски“, стигнувајќи до највисоки +15. Филип Кузмановски беше најефикасен со 11 голови, Мартин Велковски постигна шест, а Милан Лазаревски пет гола.

Со оваа победа Македонија го продолжува континуитетот на настапи на големите ракометни натпреварувања и уште еднаш го потврди статусот на селекција што знае како се играат бараж-мечеви кога влогот е најголем.