Македонија денеска може да стигне до четвртиот медал на Медитеранските игри во Таранто, откако македонските борачи вчера го отворија медалскиот биланс со три одличја.

Фати Вејсели и Реџеп Хајдари освоија сребрени медали, додека Ахмад Магомедов се закити со бронза. Со тоа Македонија се најде меѓу делегациите кои веќе имаат освоено медали на Игрите. 

Денеска вниманието повторно е насочено кон борењето, но овојпат во женска конкуренција.

Вероника Консевиќ ќе се бори за бронзениот медал во категоријата до 57 килограми, а нејзина противничка ќе биде српската борачка Милица Перовиќ. Борбата е закажана за околу 19:30 часот. 

За Консевиќ ова е можност да го заокружи успешниот ден за македонското борење и да донесе уште едно одличје за македонската делегација.

Посебно внимание во Таранто привлече и фактот што Консевиќ на Игрите е со своето 11 месечно бебе, кое ѝ е најмладата и најблиска поддршка во борбата за медал. 

Доколку Консевиќ ја добие борбата против Перовиќ, Македонија ќе стигне до четвртиот медал на овогодишните Медитерански игри.